PAUL KAGAME, INDI MANDA URASHAKA IYI KI?

Theogene Rudasingwa 12:20am Feb 24 PAUL KAGAME, INDI MANDA URASHAKA IYI KI? Niba ari ukwica, ibigwi byawe byogeye hose. Mu Rwanda, I Congo, Kenya, Tanzania, Uganda, mu Burayi na America, amarira n'imiborogo biracyari byose. Uracyakeneye kwica abandi banyarwanda? Ni ba ari ugufunga warafunze bigera cyera. Ese wumva uzanyurwa buri munyarwanda agiye mu buroko? Ese abo uhejeje mu buhunzi ntibahagije. Uzanyurwa ari uko buri munyarwanda ahunze hanyuma wowe n'umuryango wawe u Rwanda mukaruhindura irimbi ikuzimu, maze imusozi rukaba urwuri rw'inka zanyu? Ese ko abanyarwanda bagukuyeho amaboko, kuko wabarembeje ubica kandi ubatoteza buri munsi, indi manda uzayiremera abandi banyarwanda bakubera abagaragu? Ese ko nta ncuti ukigira mu karere, Afurika, no mu mahanga, iyo manda izakuremera izindi ncuti izo wari ufite zarakuvuyeho kubera imico mibi yawe? Ese Kagame ko wishimishije bihagije usigaje iki utarabona: Indege? Amago atagira umubare? Amafaranga, amadolari, ama euro? Imodoka zigezweho? Imyambaro? Ubutunzi usahura buri munsi? Ko mbona ugira urubavu ruto nk'urwanjye, ese uzahazwa n'ibingana iki? Ibyo manda wibye zananiwe, indi cyangwa izindi zizabishobora? Waravuze, uratukana wifashe ku gahanga nk'umutindi, ese amagambo n'ibitutsi ntibyagushizemo cyangwa indi manda izatuma ucura ibishya? Kagame: ihane ugarukire Imana nikubabarira abanyarwanda bazakubabarira. Reka kugondoza Imana. Yaguhaye byinshi ubipfusha ubusa; ariko na n'ubu irakurembuza kandi ikubwira ngo reka abana bayo bave mu buretwa. Bitari ibyo abanyarwanda bazagutesha iyi manda. Nuhanyanyaza ugakomeza kumarira abayanyarwanda kw'icumu n'umunigo, ukiha indi manda, niyo maherezo nayo bazayigutesha.